ELTE BTK Magyar Nyelvtudományi és Finnugor Intézet

Тронина, Ольга Алексеевна

nyomtatható változat

Тронина, Ольга  (Ижкар)

Удмурт кылын мерлык но политика удысысь нимкылъёслэн юнмамзы но азинскемзы (pdf)

Удмурт лексикаысь нимкылъёслэн азинскон сюресазы ньыль вакыт висъяны луоно:

Нырысетӥ вакыт (XVIII-тӥ даур – 1920-тӥ аръёс) герӟаськемын      XVIII-тӥ даурысь Россиын пӧртэм удысъёслэн азинскеменызы. Озьы,     XVIII-тӥ дауре кылем синпельметъёсын паськыт гинэ кутӥсько географиен но биологиен герӟаськем нимкылъёс, пумиськылэ ни мерлык но политика удысысь лексика но. Кылсярысь, нырысетӥ удмурт кылрадъянын таӵе нимкылъёс пусъемын: кунъ, эксей, эксейлэнъ кышно, тамgа, тэре но мукет;  З. Кротовлэн кыллюкамаз таӵеосыз: гурт iир, быдзим эксей улос, карысь мурт, быдзим лекъ, вужкатъ, калык люканъ но мукет. Озьыен, та вакытысь кылтодонын нимкылъёсты нимысьтыз азинтон уж öз нуиськы.

Удмурт лексикалэн азинскон сюресысьтыз кыкетӥ вакытэз (1920-тӥ–1940-тӥ аръёс) герӟаськемын Совето Кунын кыл политика удысын ортчем воштӥськонъёсын. Удмурт кыллэсь функциоссэ паськытатон но улонэ пыӵатон вылысь, кылдытэмын вал «Рудья» öри, кудӥзлэн ужаз пыриськизы тодмо но дано удмуртъёс. Нимкылъёсты калык пöлы вöлмытонын юрттэт сётӥз «Гудыри» газет. Кылсярысь, та вакытэ удмурт кылэ пыризы тэкшерон, öнер, законэз валатӥсь, куриськон, мынитэт, вазиськон но о. а. нимкылъёс.

Жаляса вераны луэ, 1930-тӥ аръёслэн пумаз та мытэм уж дугдытэмын вал, «националистъёслэн» малпам нимкылъёссылэсь куштӥськыны дэмламын вал. Озьыен, куинетӥ вакытлэн (1940–1990-тӥ аръёс) аспöртэмлыкъёсыз пöлы пыртыны луоно мерлык но политика удысъя кылдытэм неологизмъёслэсь куштӥськон но соос интые ӟуч нимкылъёсты кутон.

Выль вакыт (ньылетӥ вакыт) кутске 1990-тӥ аръёсысен, куке нош ик саклык висъяны кутскемын вал нимкылъёсты азинтонлы. Туннэ нуналъёсы удмурт кыл узырмиз трос гинэ мерлык но политика удысысь нимкылъёсын, кылсярысь: Кун Кенеш, шоркар, огазеяськон, муниципал кылдытэт но мукет. Та ужез азинтон понна но Удмурт Элькунлэсь кункатсэ берыктон понна, 1995-тӥ арын нимкылъёсъя но шонер гожъяськонъя нимысьтыз öри кылдытэмын вал. Та öрилэн валтӥсь ужпумез – удмурт кылэз нимкылъёсын узырмытон. Дыр возьматоз, пырозы-а выль нимкылъёс литературной кылэ, кутозы-а соосты огшоры адямиос.