ELTE BTK Magyar Nyelvtudományi és Finnugor Intézet

Рябина, Елена

nyomtatható változat

Рябина, Елена (Тарту)

Перм кылъёсысь буёл нимъёслэн кылдэмзы но азинскемзы (pdf)

Удмурт но коми буёл нимъёслэсь кылдэмзэс эскеризы И. В. Тараканов (1990) но А. Н. Ракин (1990). Удмурт буёл нимъёслы сӥзем уж гожтӥз озьы ик Ж. Шаланки (Salánki 1989). Докладамы пыкиськомы та кылчиослэн статьяоссы вылэ. Со сяна, ми юалляським удмурт но коми сямен вераськись информантъёслэсь, экспедициосы ветлыса (2007, 2008, 2009).

Вань кылъёсысь буёл нимъёслэн эволюцизы сярысь гожъязы Америкаысь тодосчиос Б. Берлин но П. Кей (1969). Соослэн малпамзыя, буёл нимъёслэн азинскон сюресазы сизьым стадия висъяны луэ. Нырысь кылдо тöдьы но сьöд буёлъёсты, озьы ик югытэз но пеймытэз возьматӥсь кылъёс. Кыкетӥ стадиын кылдэ горд буёл категория, кудӥз озьы ик быгатэ на луыны ӵуж, лемлет, курень яке мукет шуныт буёл. Берпуметӥ стадиын кылдо лемлетэз, пурысез, бусӥрез, нап-ӵужез возьматӥсь кылъёс. Бöрысь та теориез эскерон вылысь куд-ог тодосчиос пöртэм кылъёслэсь буёл нимъёссэс эскеризы но эволюционной схемаез тупатъяны ӵектӥзы. Озьы ке но, теорилэн валтӥсь малпанъёсыз туннэ нуналозь воштӥськемын öвöл.

Б. Берлин но П. Кей (1969) тодосчиослэн теоризы вылэ пыкиськыса но бöрысь печатлам ужъёсты лыдэ басьтыса (Кей но мукет. 1991), У. Сутроп (Sutrop 2002: 155–193) эстон буёл нимъёслэсь азинскемзэс эскериз. Кылчилэн малпамезъя, пöртэм вакытъёсы буёл нимъёс воштӥськыны быгато: кыкетӥ стадиын горд буёлэз одӥг сямен вералозы, нош бöрысь стадиосын – мукет сямен. Кылсярысь, туала вакытэ финн-угор кылъёсын тöдьы но сьöд буёлъёсты пöртэм сямен верало, нош урал вакытэ вашкалаосмы югытэз но пеймытэз *jelä но *pil'mɜ кылъёсын верало вылэм. Огъя финн-угор вакытэ горд буёлэз верало вылэм вирез возьматӥсь *wire кылын. Финн-перм вакытэ иран кылысь асэстэмын вылэм вож но ӵуж буёлэз возьматӥсь *wiša кыл.

Туала вакытэ перм кылъёсын сьöд, горд, вож, лыз буёлъёсты возьматӥсь кылъёс одӥг кадесь луо. Тöдьы буёлэз та кылъёсын пöртэм сямен верало: удм. тöдьы, кз. еджыд, кп. чочком. Перм выжыысь калыкъёс нимаз улыны кутскем бере, удмуртъёс асэстӥллям тюрк но ӟуч кылъёсысь буёл нимъёсты, кылсярысь курень (булг.), чагыр (булг.), льöль (ӟуч). Коми кылэ пыриллям ӟуч кылысь буёл нимъёс: руд ‘пурысь’, алöй ‘лемлет’.

Уже кутэм литература:

Ракин, А. Н. 1990: Лексика цветообозначения в пермских языках // Труды по финно-угроведению. Актуальные проблемы уральских языков 16, Тарту, 112–121.

Тараканов, И. В. 1990: Термины цветообозначения в удмуртском языке в сравнении с коми, марийским и мордовскими языками // Вопросы диалектологии и лексикологии удмуртского языка: Сборник статей, Ижевск, 103–125.

Berlin, B. – Kay, P. 1969: Basic color terms: their universality and evolution. Berkeley.

Kay, P. – Berlin, B. – Merrifield, W. 1991:  Biocultural implication of systems of color naming. In: Journal of Linguistic Anthropology, Vol. 1, No. 1, 12–25.

Sutrop, U. 2002: The vocabulary of sense perception in Estonian: structure and history. Opuscula Fenno-Ugrica Gottingensia. Frankfurt am Main: Peter Lang.

Salánki, Zs. 1989: Väriennimitykset Udmurtin kielessä. In: Grünthal, Riho (et al eds.) 1988: IFUSCO. Proceedings of the Fifth International Finno-Ugrist Students' Conference, Helsinki, 22-26 May 1988. Edited by Riho Grünthal [et al.], Helsinki, 7275.