ELTE BTK Magyar Nyelvtudományi és Finnugor Intézet

Князькина, Елена

nyomtatható változat

Князькина, Елена (Саранск)

Эрзянь кельсэ валонь теевемань китне-янтнэ (pdf)

Валксонь сюпагавтомась – те келень касомань-полавтовомань сехте неявикс ёнксось. Валтнэ кеместэ сюлмазь эрямонь ёнкстнэнь марто, невтить эрямосо вастневиця весе полавтовкстнэнь, секскак келень валксозояк а ашти ве таркасо, апак лотксе полавтневи.

Эрзянь кельсэ явовить валонь теевемань истят кить-янт: аффикстэме, аффикс вельде, аффиксоид вельде ды  кавто эли седе ламо вальюрсто (валлувсто) од валонь теевемась.

Аффикстэме валонь теевемась  – те истямо кись-янось, конань пингстэ од валтнэ теевить уликс валсто. Сонсь валось а полавтови, ансяк полавтовить сонзэ грамматикань-смустест ёнксонзо. Лиякс те кинтень-янонтень мерить смустень коряс валтеема. Явовить истят лувонь кужонзо: кортамо пелькстнэнь субстантивация (ваныця зритель), адъективация (эрявикс нужный, необходимый), адвербиализация (верев вверх) ды вербализация (начкомс намокнуть).

Аффикс вельде валонь теевемась явови кавто кужова:  суффикс вельде ды префикс вельде.

Суффикстнэ нолдтневить тевс допрок весе лувонь кортамонь пелькстнэнь теемстэ: а) существительнойтнень (ленге липа ленгекс липа (молодая); б) прилагательнойтнень (пешкедемс наполниться пешксе полный); в) глаголтнэнь (валдо светлый, свет валдомомс посветлеть); г) наречиятнень (келей широкий  келейстэ широко).

Префиксациянть уликсчиде-арасьчиде кевкстеманть кувалт мокшэрзянь кельванныйтне пелькстыть те шкас, те кевкстемась течис кадовкшны педе пес апак топавто. Эрзянь кельсэ явовить ансяк зярыя префикст: -а (аламо немного, асатыкс недостаток), -кой (кой-косо кое-где), -та (та-кие некто, кое-кто), -таго (таго-зярдо).

Аффиксоид вельде валонь теевеманть кармасть явомо аволь умок.  Эрзянь кельсэ валонть теемань системасонть те кись-янось саи башка тарка: сонзэ вельде теевить валонь рисьметь, конат малавикст кода аффикс вельде теезь валтнэнень, истя жо кавто валсто (валлувсто) теевкстнэненьгак: ярсамопель еда, кальбуло ивняк.