ELTE BTK Magyar Nyelvtudományi és Finnugor Intézet

Баринов, Виктор

nyomtatható változat

Баринов, Виктор (Саранск)

Волостень судса 19 –це векть песта сявомок 20 –це векть ушедоманцты молемс мордовскяй койхнень – обуцятнень тевс нолдамасна (pdf)

19 векть песта – 20 – це векти молемс мокшэрзянь крестьяттнень юридическяй культураснон вииямац – касомац ламоста ащи мордовскяй народть коензон – иланзон эзда.

Мокшэрзянь койхне – обуцятне крестьяттнень эряфса занцесть оцю васта видешить вешемста. И тага, аф пяк цебярь законодательнай базась сидеста кошарязень судьятнень шарфнемс мяль народнай койхнень – обуцятнень лангс.

Волостень судьятнень примаф решениясна сидеста тиендевсть правань обычнай норматнень, народнай правосудиянь базиснай принципнень коряс. Тяфта, мзярда появакшнесть каршек мяльхть рьвяяйхнень ёткса, синь тядясна – алясна якасть волостной старшинати, конань ульсь правац кошардомс рьвяямань закононь колсить панфтомс даця.

Волостень судсь, мзярда ванодсь тев туфталфтома ат казакшни рьвяяйхнень калга, сон примсесь решения мрдафтомс максф ярмакнень и паршихнень, панфтомс рьвяяйхнень наряжамс ётафтф карьхцнень, и тага пандомс эряволь „особай питне” „честень наругаманкса”, кона пачкоткшнесь мянь вете цалковай с сияса.

Волостень судьятне кирнезь мяльс кунардонь пингонь мокшень семьятнень койснон – обуцяснон, конатнень коряс судендакшневсть авась мирденц мяленц коряс, шабатне шачфтыснон мяльснон коряс.

Волостень судса ётафневольхть кулхцонкшнемат, мзярда велень обывательх не лувондовсть паршлень аф ванфтыкс и мельгаст путнесть ваныхть. Эрсесь и тяфта, мзярда волостень судтне кирнелезь ширенц кудазорть, алять, хоть сон улендсь и паршиень аф ванфты. Велетнень эса васьфневсть атят, конат аф виздесь «визьксфтома шамат» ётафнелезь семботь, мезе кочкасть – прдасть синць и синь алясна – тядясна эряфоньберьф.

Волостень судтнень эса доказательствакс лувондовсть собственностень юридическяй знакне (тамгатне), конат сидеста полафнезь сонцень „подписть”.